La Usc di Ladins

L nutjiasm fova grant canche la grupa Panda la 9, cun Marc Senoner y Luca Langgartner, ie zapeda sun palch per purté dant si ciantia rap "Fiat Punto". Jëuni y jëunes, mutons y mutans, ëi y ëiles de tan che uni età à fat pea, se devertian dassënn.

La sëira de rap metuda a jì dal Circolo-Lia Mostra d'Ert a Urtijëi n vënderdi dl'ena passeda, à purtà legrëza, devertimënt y ritm tla valeda. Ma nce n vënt nuef, che vel' da de tel ne n'òven mo mei udù te Gherdëina. Sun palch iel unì ciantà, o miec dit rujenà n rima, te de plu rujenedes – dantaldut ladin, ma nce talian y tudësch. L ie stat da rì, ma nce da pensé do, davia che tres chësta mujiga se fej i jëuni y la jëunes audì, zënza tëma de te dì bel tla musa cie che i pënsa. Chësc ie l rap, critica soziela cun ironia, ma nce legrëza de viver y de vester bon de superé la deficulteies. Nia per cajo, à l rap si ravises danter la jënt plu puera: l se trata de na mujiga che vën dala cultura dl hip hop nasciuda ti ani '70 ti Stac Unic – plu avisa tl Bronx a New York – dala populazion afroamericana.

L articul n cont dla sëira de rap ie da liejer tla edizion che vën de La Usc di Ladins

Elisabeth Kostner