La Usc di Ladins

"N se fej ert a abiné mostres fates cun fundamënt, mostres metudes mpe nia mé per ti jì do ala modes, ma che ebe nce n senificat. Chësta ie una de chëles, l ie na mostra che ie bona de valorisé n pez de storia dla cumenanza de vosta valeda", cun chësta paroles à Giorgio Marini dl minister de Roma laudà la mostra speziela dedicheda a Guido Balsamo Stella, mostra che ie unida inaugureda n juebia ai 9 de nuvëmber tl Circolo-Lia Mostra d'Ert a Urtijëi. Pra la giaurida fova nce leprò l presidënt dl Museum Gherdëina Mathias Höglinger y la diretëura Paulina Moroder, l presidënt dla Lia Mostra d'Ert Mirko Insam, l diretëur dla Repartizion provinziela per la Cultura ladina Mathias Stuflesser, l ambolt de Urtijëi Tobia Moroder y coche bele dit Giorgio Marini. Ël ie unì adalerch coche reprejentant dl Istitut Zentrel per la Grafica de Roma, Istitut da chël che n à giapà n mprëst n valguna opres de gran valor dl artist y ex-diretëur dla Scoles d'ert de Urtijëi y Sëlva, Guido Balsamo Stella.

Nzijions mo mei mustredes
Propi de chisc mprësć, danter auter nce lëures mo mei prejentei, à nce rujenà  la diretëura dl Museum Gherdëina Paulina Moroder pra la giaurida dla mostra: "Chësta ie nce per nëus na mostra scialdi particulera, nce pervia di mprësć de gran mpurtanza y zic tl medemo tëmp: i ie tan dlecac che l sforz logistich y de segurëza ie stat ora de mesura grant". Nsci lëuren bele da doi ani incà per mëter a jì chësta mostra, che à l fin de mustré su coche l ex-diretëur dla scoles d'ert, Guido Balsamo Stella, ie stat bon de ndrezé via te na direzion nueva l nseniamënt y nce la scultura de nosta valeda. "Balsamo Stella ie stat na persunalità sterscia che à abù na gran mpurtanza per l'ert figurativa de Gherdëina", nsci Paulina Moroder.


L articul ie da liejer doduman tla edizion nueva de La Usc di Ladins

Elisabeth Kostner