La Usc di Ladins

La setemèna passèda con Fabio Chiocchetti aon rejonà del Dizionèr toponomastich, de enrescida scientifica e de la valuta de la toponomastica te la politica linguistica. Anché jon a veder la normativa e coche l publich se dèsc ju per l stravardament de chest gran melaur. Aon descoret de chest con Evelyn Bortolotti, responsabola di Servijes linguistics e culturèi del Comun General de Fascia. Belimbont l ent fascian con sia Comiscion toponomastica, aldò de la lege provinzièla 6/2008, à la competenza en materia con ence la ressorses economiches aldò, ma ampò con vèlch limit. Te Fascia l é stat fat n gran lurier de enrescida su la toponomastica ti egn passé e l’atenzion vegn scialdi tegnuda empeèda sul argoment, ence de gra a l’Aisciuda Ladina che per l secondo an de seghit la é dedichèda a chesta tematica. Te chest chèder l Comun General de Fascia à endrezà ence trei raides per cognoscer i inomes e mingol de storia de nesc lesc: do la prumes doi endrezèdes da Moena su la seides del Prinzipat ai 17 de mé e forin Mont de Vich anter storia e devozion ai 24, chesta sabeda ai 31 sarà l’ultima raida ‘A ciamorc sul Jouf’ da Pordoi a Ciantrujan. De chestes daron cont sul numer che vegn de La Usc di Ladins.

Se pel lejer dut su La Usc nr nr 20 dai 30 de mé: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper.


 (Nicoletta Riz)