La Usc di Ladins

Mo nia de segur per l troi da jì a pe danter l raion Scimenon y Soplajes. Per chi che va a pe dala streda Sacun de viers de Soplajes iel al mumënt scialdi periculëus a passé via l tòch de streda sot ala cësa Alba. Iló ne n’iel degun tretuar y deguna risses. N muessa jì sun stradon, cuché do l cianton de cësa ca sce l ne vën miano n auto y pona se spazé. L ie da temëi per i granc, po’ pa permò per i mëndri che va a scola, per la omes cun n bagl o la jënt de tëmp. L ie na luegia strënta y periculëusa nce per chi che va a spaz do l troi dla ferata ite y muessa iló passé via l stradon.

I truep mutons y mutans che sta tla cëses nueves, che ie unides frabichedes dan n valgun ani tla streda Sacun, tol al mumënt n auter troi per jì a scola: i passa via per pra y danter la cëses ju schivan l tòch de stradon. Iló ne n’iel nia n troi publich, ma i ujins lascia pro che i passe da iló via. Chësta ne n’ie sambën nia na soluzion, ie gran pert di cunselieres de Chemun de S. Cristina a una, l ie debujën de n troi ufiziel, ulache duc posse for passé.

Elisabeth Kostner

L articul ntier tla edizion nueva de La Usc di Ladins de n vënderdi ai 6 de merz.