La Usc di Ladins

Nia mé l numer di atlec, ma nce l numer di tifosi de biathlon ie cher­sciù. Nce te nosta valeda iel trueps pasciunei che ti cëla cun pascion a uni garejeda de Copa dl Mond tla televijion.
Davia che vel’ lia de Gherdëina se à uni tant damandà de pudëi purvé a stlupeté cun n stlop da bia­thlon coche pitla »jita« per i cu­mëmbri, se à i alenadëures y l respun­sabl dla sezion biathlon dl Schi Club Gherdëina mpensà de mëter a jì na garejeda a livel de valeda per duta la lies nteressedes. Bën 11 lies cun de ndut 86 cu­mëmbri se à pona ancuntà n sada domesdì ai 14 de merz pra l zënter de biathlon te Val. Do avëi mprestà schi, ciauzei y fusć, fòvel bele ëura de pië via. I partezi­panc messova fé na raida de 700 metri cun i schi da pudejé y pudova pona se fermé pra l poligon y stlupeté cin’ colps cun n stlop a aria. Do avëi fat la raides de straufonga, pudova i partezipanc jì ndrët tl travert.
Sambën ne n’iel per la gran pert nia stat saurì a fé na raida tan sfa­diëusa cun i schi da pudejé y pona se fermé y purvé a tuché. Ma pur­empò à duc cialà de dé dut y de purté ponc a si lia.