La Usc di Ladins

“Ie son n pue’ da vedlamënter”, dij Ewald Senoner de sé nstës. L ti sà mo bel a lauré cun la mans, a fé zeche da fonz su, nce sce l costa fadia. Ani alalongia àl laurà te si berstot da marangon te Sëlva. La massaria ie mo duta iló, ma śën féjel n pue’ zeche d’auter. Do che l ie jit n pension se àl dedicà cun pascion a fé miniatures. L ti à dat forma a n mond de chël che l se lecorda cun nchersciadum: l luech de Sëlva, coche l fova plu da giut cun la jënt che l à cunesciù y i artejans che ne n’ie nia plu. Te chësc mond iel nce lerch per la paroles per ladin, che n ne cunësc nia plu y che Ewald scrij su cun cura daujin a si criazions per ne les desmincë. L à dut fat do nchin ti plu pitli details, cun miniatures dla dlieja, de vel’ luech da paur, dla cuntreda, de berstots, de vedla massaria y cun figures che se muev. Sce l te gëura la portes de si tublà ta La Poza te Sëlva, posses zapé ite te chësc mond. L ie na pitla marueia.

Elisabeth Kostner

L articul tla edizion atuela de La Usc di Ladins.