La Usc di Ladins

Sciöche l’ann passé, á temperatöres valgamia frësches y n pröm sblauch de nëi acompagné le Rait de San Linert da iniann, tigní en domënia ai 8 de novëmber. Al n’á indere nia mancé cotan de spetadus che é rová adalerch por ti ciaré ala defilada tradizionala y por tó pert al de de festa dl sant protetur San Linert.

Ala defilada dla 26. ediziun á partezipé iniann 150 ciavai dles razes norics y haflingher; demanco en confrunt al’ediziun iubilara dl ann passé, olache al n’ê gnü cumpedé daimpró da 200. I organisadus â bele l’ann passé incundé na reduziun di partezipanc ala defilada por les proscimes raitades, na dezijiun che é gnüda a s’al dé plü co ater por chestiuns de logistica. Oramai á la raitada arjunt chël punt olache ara ne vá nia da ti dí de sce a düc chi che oress fá para. L’interes é gran.

Le Rait da iniann á desmostré che deplü n’ó nia tres dí ince miú, mo che cun la bona organisaziun y la colaboraziun danter i volontars, les assoziaziuns locales y i grups desvalis, vára da lascé garaté tres indô na bela raitada, sciöche chëra da iniann, che á albü sües novités y la presënza de ghesć speziai da mostré sö.


Deplü da lí ciafëise tla ediziun nöia, publicada vëndres ai 13 de novëmber!