La Usc di Ladins

Les stëres Michelin ne vëgn nia ma partides fora a coghi y restoranc, mo ince a chelneri che se alza fora por le bun sorvisc che ai fej te salf. Chësc reconoscimënt ti é en chësc ann gnü surandé al chelner Christian Rainer, nasciü a Maran, che vir bele da vint agn incá a Badia. Christian é chersciü sö tl hotel storich Goldenes Kreuz, tla val de Schnals. Tl hotel de familia ál imparé le mistier y spo él jü a studié tl seminar vescovil Johanneum da Dorftirol. Al é jü a lauré foradecá y canche al é indô gnü zoruch tl Südtirol, él rové tl restorant St. Hubertus - 3 stëres Michelin - dl Hotel Rosalpina da San Ciascian, olache al á lauré por vint agn alalungia. Sëgn laora Chirstian tl restorant gourmet dl cogo fascian Peter Brunel a Arco tl Trentin. Al nes á cunté de so laur y dla ligrëza de avëi ciafé n reconoscimënt tan important. Ci che al nes á dit podëise lí tla ediziun stampada d'La Usc di Ladins.   (kp)