En Pasca porta les ëres n cëst plëgn de bun patüc da mangé
View the embedded image gallery online at:
https://www.lausc.it/valedes-ladines/val-badia/15315-pasca-y-suees-usanzes#sigProId959a687597
https://www.lausc.it/valedes-ladines/val-badia/15315-pasca-y-suees-usanzes#sigProId959a687597
Ince aldedaincö ascogn umes i üs intënc te val’ post te o defora da ciasa; i mituns se conforta döt l’ann da podëi jí en Pasca a chiri les coes; laite ciafi incö scialdi üs da zuculada y val’ atra duciaria, deache i mituns ne n’é nia plö tan inressá sön i üs cöc sciöche dandaia; dailó sce ê pa ciafé üs intënc na sensaziun; na pert ne mangiâ pa cotanc, cis sce ai ne davagnâ da cufé piz y de cuf. La usanza da ascogne üs da Pasca é chi 300 agn vedla.
Incö é le lou da Pasca bindebó de marcé por les botëghes che ne arjigna de vigni sort, de dërc y de chi de plastica a corú, de pici y de gragn da zuculada; valch á de beles pitöres lassura. Les jones intenjô i üs cun erbes y de vigni sort de corusc; ares scriô lassura dic plajors por i ai dé al chestian.
Le jí a üs ê naota na usanza aspetada por i jogn; ai jô en Lönesc de Pasca dala chestiana a üs o da val’ atra jona che i plajô; conforma ala relaziun che le jonn â impara ciafâl ince n tan de üs: 6 üs dala chestiana y zënza ma dui; por les jones êl na onú, sce ares gnô lëdies di üs. I fioc y les fioces ciafâ dai toc o dales totes i üs da Pasca: te Mareo cina che ai é fora dla scora, te d’atri paisc él la usanza da i dé i üs ai fioc y ales fioces cina che ai se marida.
Dandaia êl usanza che no ma i mituns, mo ince i gragn cufâ a davagn le Lönesc de Pasca sön plaza de dlijia y la domënia do che â inom Segra dai üs. Na pert n’â de bugn y ne mazâ ite valgügn ai atri che ai podô spo se saulé. Chësta usanza é gnüda jö cun le bëgnester; incö pó düc se vaghé üs ia por l’ann da cujiné, da i cöje te ega o da i cöje te smalz.
Lois Trebo