La Usc di Ladins

L’artist Albert Mellauner, nasciü dl 1947 a Rina, é un di protagonisć dl restart dl’ert te Südtirol. Dan otedé á le Museum de cité da Bornech invié ia la daurida dla mostra retrospetiva de Mellauner, che ess messü gní fata bele dan da n ann, mo á messü aspeté a de mius tëmps. Sëgn é i tëmps mius y la vita publica pó se daurí cautamënter, les esposiziuns te museums y galaries inviëia indó ite publich y dediziun. 
La vernissaja, sce an pó ti dí insciö, dla mostra é stada delicata y intima sciöche les pitöres dl artist che ne sbroca nia fora o n’á nia intenziun da cherié provocaziun o revoluziun. Söl post él antergnü dan otedé la presidënta dl Museum Barbara Willimek, l’Ombolt da Bornech Roland Grießmair, l’ex assessur prov.l ala cultura ladina Florian Mussner, le fotograf di laurs tla monografia nöia Hermann Maria Gasser y la publizista y auturia Eva Gratl che á curé la bela monografia de Mellauner. Val’ familiar, artist y compagn á ince orü tó pert al’introduziun y al acompagnamënt cun l’artist fora por les alzades dla mostra. 

»I sun un, che ó depënje bel« 
Eva Gratl scri te süa prejentaziun tl liber che Albert Mellauner cür zënz’ater öna dles posiziuns artistiches plü singolares tla pitöra de Südtirol. Tröc agn alalungia s’ál dagnora dé jö cun so tëma, chël dl corú y dla lerch. Al é so tema de vita artistica, ch’al á lauré fora y ince svilupé inant te n gröm de variaziuns. Y avisa tan por so cunt ti él jü do al tru dlvers dl’astraziun y cun döta süa opera dijel fora val’ de tler. Chësta süa posiziun é da odëi fora ince da ci che al dij: »I n’ê mai daldöt contënt cun mi resultac artistics cina che ... i sun ruvé pro la pitöra astrata«.

La mostra é da odëi cina ai 11 de messé 2021.

Liede do deplü tla ediziun atuala de La Usc di Ladins!  (Iaco Rigo)