Ert tla nëi a Lungiarü
A Lungiarü él gnü metü da jí fora por l'invern »Cërtli tla nëi«. Indöt él gnü realisé 15 dessëgns. Les operes plü beles é gnüdes premiades
I conesciun düc i cërtli tla bla, odüs gonot sciöche operes realisades da extraterestri, che vëgn conscidrades sura döt le monn sciöche operes d’ert. I Jogn da Lungiarü á tratan chësc invern metü da jí por le pröm iade la verjiun invernala de chësta pratica: i cërtli tla nëi. N'iniziativa, che moscëda adöm na ativité sana alaleria cun na buna fantasia y creativité, olache i partezipanc s'á devertí fajon de gran dessëgns sön les sperses blances che se destënn fora sön nüsc pra tratan l'invern. Indöt él gnü realisé 15 operes te localités desvalies dl paisc da Lungiarü. Cun la fin dl invern él spo gnü dé la poscibilité a dötes y a düc da dé jö süa usc por l’opera preferida. L’iniziativa s'á stlüt jö cun la premiaziun di trëi cërtli plü aprijá.
I Jogn da Lungiarü rengraziëia i partezipanc y les partezipantes y se aoda da podëi indô odëi tröpes creaziuns tl invern che á da gní, cun la secunda ediziun de »Cërtli tla nëi«. Dötes les operes fates tla nëi é da odëi a chësc link www.lungiaru.it/wp/certli-tla-nei/
Galaria retrac
- Laur fat da Karin, Pio y Mario a Pecëi .
- Opera de Cindi y Aron tla localité Ustí Vedl.
- Laur fat da Sonia, Sofia y Helga a Sunví.
View the embedded image gallery online at:
https://www.lausc.it/valedes-ladines/val-badia/15979-ert-tla-nei-a-lungiarue#sigProId044415fae2
https://www.lausc.it/valedes-ladines/val-badia/15979-ert-tla-nei-a-lungiarue#sigProId044415fae2