La Usc di Ladins

De jügn fora, can plü adora can plü tert, éra tan inant che le bestiam vëgn mené te munt. Por chësta bela ocajiun dla balëza dl isté s’unse ponsé da jí a ciafé le famëi jonn Simon Declara, te na bela sëra cialdina, por ti fá en valgönes domandes y por s’la ciacolé n pü’ impara. Ël nes á, do avëi paré daite da si n per de vaces che ti ê sciampades fora, daurí la porta de süa ciasota olache i ún spo podü s’la cunté. 

Incër 130 tiers röiel vigni ann sön la munt de Giau, che é bindebó alalt, ara pëia ia dai 1.800 m por s’alzé cina ai 2.236 metri sura le livel dl mer. Ara tol ite chi 180 etars de pastöra, olache jö al bas él bindebó da bosch y söimsom é scialdi döt plat. Le bestiam vëgn döt dala Val Badia: Badia, Corvara, La Val, Rina,… chësta munt pó avëi plü’ ütli por i paurs, la ciaussa vëgn menada ite plü adora co te d’atres munts y ince por le trasport él manco laur, ara pó gní menada cun camions y traturs, y an ne mëss nia la paré ite a pe. Jí te munt é n gran aiüt: tröc paurs n’á nia bria d’isté da ti sté do ai tiers, al vëgnel sparagné n gröm de fëgn y an ne abina nia sö tan de coltöra, y dantadöt ti fejel bun ai armënc, deache ai pó sté alaleria, te na bona aria a mangé erba frësca por prësc cater mëisc.

Liéde do deplü tl articul de Lucia Piccolruaz tla ediziun atuala y söl e-paper (a paiamënt) de La Usc di Ladins!