L'iniziativa WOWnature á sciöche fin chël trá sö i bosć danejá dala tampesta Vaia dl 2018, mo ince da mantigní i bosć che é, ressursa fodamentala por afronté la crisa dl clima tl dagní
WOWnature é na iniziativa metüda da jí da Etifor, aziënda de consulënza dl'université de Padova, adöm cun l'Alta Badia y la Maratona dles Dolomites, cun le fin da trá sö danü i bosć danejá dala tampesta Vaia dl 2018. Bele de jügn êl gnü senté lëgns tl bosch sön Ciaulunch, olache le gran vënt n'â sciuré jö zacotanc. Sëgn d'altonn él gnü metü da jí ciamó dui dis dedicá ala renasciüda di bosć. Trat ite án en chësta ota ince les scores y les porsones y les firmes che á sostigní la scomenciadia. Tratan chëstes giornades él gnü baié dl bosch y dl'importanza che chësc ecosistem á y ará tl dagní por afronté le mudamënt dl clima.
I studënc sënta lëgnsEn vëndres ai 17
de setëmber é i scolars y les scolares dla secunda classa dl ITE da La Ila jüs sön Ciaulunch, te chël bosch olache Vaia â fat n gran dann. Chiló ái senté lëgns y al é sté na buna ocajiun por sensibilisé i studënc te na manira ativa sön la problematica dl mudamënt climatich, ince deache les bases scientifiches de chësc argomënt é por ëi en chësc ann argomënt de stüde. Dui esperc á splighé les funziuns y l'importanza che i bosć á por la porsona. Al é ince gnü baié dl problem lié al chefer dla scorza. I studënc á imparé che sentan n lëgn pón dé n contribut por combate la crisa dl clima. Düc i scolars á tut pert cun gran entusiasm y interes ala scomenciadia y á indöt podü senté 30 lëgns. Ince la domënia ai 19 de setëmber él gnü senté lëgns sön Ciaulunch. A chësta giornada á tut pert les porsones y les firmes che á sostigní l'iniziativa WOWnature tres l' »adoziun« de n lëgn sön la plata internet dedicada ala iniziativa.
Mantigní inant i bosć I lëgns é i simboi dla batalia cuntra le mudamënt dl clima. Tres l'implant de lëgns ón cherié y mantigní ecosistems por presservé nosc raiun. Ti bosć sön Ciaulunch i vá i organisadus de WOWnature ince do a n ater proiet: trá sö y ciaré di lëgns y dles plantes che é nasciüdes y che crësc iló spontaneamënter do Vaia, sciöche brüsces da dlasenes y müies, orties, rabarbar y ii. De chësc raiun ón ciaré, an ó romené sö y mantigní le bosch, mëte sö tofles informative,s mëte a post i trus, les roes y i danns gaujá dal ri tëmp. Döt chësc garatará tres i contribuc che gnará coiüs adöm sön la plata internet
www.wownature.eu/alta-badia-adum/
(kp)
