Cun les ultimes gares a Pichl-Gsies, stades ai 4 y 5 de setëmber, s'á stlüt jö la sajun dla roda da munt por i mituns. En chësc ann á tut pert tröc mituns y mitans ai alenamënc a les gares de Vss, Minibike y Südtirolcup, pratican deplü disciplines, sciöche cross, country, easy down, dual slalom y eliminator. Les gares ê suradöt tl Südtirol, mo ince foradecá. I atlec dl club Rodes Val Badia s'á alzé fora y é rová sön les classifiches di »Internazionali d'Italia« sön l'isola d'Elba, a Trieste y a Nalles. La sodesfaziun da avëi tut pert a chëstes competiziuns é stada grana y an á ince porté a ciasa deplü pesć, copes y medaies.
La partezipaziun di mituns cina 14 agn, partis sö te deplü grups aladô dles capazités y di alenamënc desvalis de vignun, é indô stada grana y ai á desmostré gran ligrëza, pasciun y impëgn. Al é gnü fat deplü ativités por svilupé y mioré la tecnica, la dorada y le laur de grup por ester plü sigüsc y bugn da afronté les desfides cun la roda. I ún podü osservé le mioramënt y la pasciun che chersciô ti mituns y la gran vëia da tó pert y crësce sciöche grup. Le sport dla roda dëida ince nüsc mituns tl svilup sozial y porta a de bunes fondamëntes por na basa sterscia de so svilup.
I alenadus Franz, Nikolas, Anna, Susann y Ilse se á dé jö y á desmostré ligrëza y savëi tl arjigné ca i mituns a chësta ativité. I se aodun che i mituns pois se tó para la bela esperiënza y mantigní inant la pasciun por la roda. N gran dilan a düc chi che a porté pro da realisé chësc bel isté y i se confortun da se odëi indô n ater ann. (Rodes Val Badia )
Ligrëza, devertimënt y pasciun da jí cun la roda
Cun i pröms de setëmber s'á stlüt jö la sajun dla roda por i mituns y les mitans che á tut pert ales ativités da d'isté metüdes da jí dal club Rodes Val Badia
Galaria retrac
View the embedded image gallery online at:
https://www.lausc.it/valedes-ladines/val-badia/17205-ligreza-devertiment-y-pasciun-da-ji-cun-la-roda#sigProIdf814b67adf
https://www.lausc.it/valedes-ladines/val-badia/17205-ligreza-devertiment-y-pasciun-da-ji-cun-la-roda#sigProIdf814b67adf