La Usc di Ladins

La mostra nöia "Lostriades" dl Museum Ladin Ciastel de Tor porta dant le tema dla mobilité tles valades ladines tratan l’invern, mostran sö i mesi y les massaries da inlaota, olache chësta sajun metô sot a smorzia les capazités dles porsones, rovan cina aldedaincö, olache la popolaziun é stada bona da trasformé la nëi te na gran oportunité che á porté bëgnester y de gragn mudamënc sozio-economics.
Paolo Vinati y Mattia Maldonado, i curadus dla mostra, se dá jö bele da plü tëmp cun chësta tematica tres les testemonianzes scrites y fotografiches, che an ciafa te na rica biobliografia y chëres a usc che á na valüta che ne vá nia da sciazé. Rodan fora por les valades é i dui curadus stá bogn da cöie adöm toc plëgns de storia, che nes cunta nostes raisc y che liëia adöm i 1.191 km² de spersa dla Ladinia te n coletif cultural che é da odëi tl Ciastel de Tor cina ai 26 de agost dl 2022. La mostra pón vijité debann, cun la cherta vërda, tratan i orars de daurida dl museum. Ara é ponsada por n publich de interessamënc desferënc: da jënt cun bele plü esperiënza, che pó se identifiché ti retrac di mituns che fej la ferata cun les liöses o de n berba che ciaria ite la “grásseda” te gratón — sciöche an dij por fodom— ai mituns y les mitans che pó odëi ite le gran salt che é gnü fat ti ultims secui y reconësce realtés che an n’é gonot nia bogn da s’imaginé.
L’esposiziun fej pert dl’iniziativa y dla tematica "Trasport – Transit – Mobilité", gnüda aconsiada ai museums dala Euregio Tirol-Südtirol y Trentin.