La Usc di Ladins

En mertesc ai 9 de novëmber s'á incunté por le pröm iade le »Green Team Alta Badia«, grup nasciü por porté inant iniziatives y proiec cun le fin de arjunje la zertificaziun de n turism sostenibl da pert de GSTC – Global Sustainable Tourism Counsil. Le fin de chësc grup »vërt« él chël de traté y svilupé conzec y proiec che á da fá cun la sostenibilité, da cherié acordanzes y sinergies por mëte jö indicaziuns concretes por chi che laora sön le teritore. Le »Green Team« é metü adöm da rapresentanc dl turism, dles aministraziuns de comun, dles manifestaziuns internazionales, di paurs, di lifc, dla »Lia da Munt« y di grups di jogn. Les incuntades dl grup gnará coordinades da Max Nagler y Roberto Huber, direturs dl'Assoziaziun Turistica y de Alta Badia Brand.

Tratan la pröma incuntada dl »Green Team« él gnü porté dant i vari che messará gní fac por ciafé la zertificaziun, tolon ite düc i ciamps olache an messará intervegní. Implü él gnü metü sön mësa proiec y scomenciadies che an se tol dant da fá sön le teritore, imprömadedöt la mosoraziun dl impat ambiental tl comprensore, por definí spo la strategia de reduziun y compensaziun che gnará portada inant sön plü agn. Tla pert finala dla incuntada á spo vigni rapresentant porté dant sües idees y vijiuns sön chësc tema y proiec concrec che gnará metüs da jí tl dagní. Tratan les proscimes sentades gnarál analisé les propostes y les iniziatives; al gnará metü dant les priorités, por pié ia chësc tru düc deboriada.  (kp)