La Usc di Ladins

La "iata borba" é n jüch feter mort fora, mo i dijun "feter", ajache al é ćiamò de chëres y chi che le tin vi. Almanco a La Pli de Mareo. En Santabogna vëgnel cherdè adöm n grup de porsones te na stüa o te n maiù salf, por chirì fora le pröm, a chël che al i vëgn stopè o ciolè pro i edli - por che al ne vëighes nia. Canche ara é tan inant che chësc ne vëiga plü nia, vëgnel rodé por che al perdes l’orientamënt, y dedô lascè su en pé amesa stüa, por che al mëtes man da pié ia a chirì y pié zacai. I atri é incërìa, roda y sciampa, por che ai ne vëgnes nia abinà. Canche öna o un é pié, mëss le protagonist stomè chê che al é, por chësc anüzel les mans y inće le nês... Sambëgn pôl inće baié da rì y porvè da mëte da rì chi incërìa, por che ai se embanësces. N iade che chël pié é identifiché, i tóchera a chësc da se lascè ciolè pro i edli y pié ia a nen abiné öna o un.
Por fà chësc jüch ne adoron nia, al basta n fazorel o ćiaz por ciolé ia i edli y na buna compagnia che sta ion adöm, ô n pü’ s’armöie y busié, y se cherié süa aurela cörta te ćiasa. Ester él inće na ocajiun por sozialisé... Y an s’anadà spo che al n’ô nia ester n "social-network" por trà ia le tëmp, y chirì y apié compagns!  (Iaco Rigo)