La Usc di Ladins

Por i comuns n’él nia tëmps saurisc. Danter cosć che crësc de un n vers y le bojëgn da finanzié sorvisc y strotöres dl ater vers, é les aministraziuns sforzades da jí a chirí scioldi altró. Le Comun de Mareo á tut la dezijiun da vëne bëgns de süa proprieté. Bele l’ann passé âl venü i locai olache al ê laite la Cooperativa Turistica, por mëte chi scioldi tla sënta nöia dla Crusc Blancia. Iniann ai 29 de merz á le Consëi fat fora al’unanimité da vëne les 1.726 aziuns che le Comun á pro la Sozieté dai Lifc d’Al Plan Spa (ares fej fora na partezipaziun dl 1,6%). Le travert: cumpré locai por i ambulatori tl frabicat nü dla Sozieté dai Lifc (ex nodadoia curida). Cun la orenté da ti dé la poscibilité a düc i zitadins da pité por les aziuns, él gnü scrit fora 16 pachec da 100 aziuns y 1 n pachet da 126.
Indere: pité n’á gnanca un n privat de Mareo, mo ma trëi sozietés. Chëra che s’á assiguré les aziuns é la Kronplatz Seilbahn AG, cun n prisc che mostra sö tler: ai orô les cumpré. I bornec é sëgn le majer azionist su y deboriada cun i lifc da Valdaora á i pustri plü co le 30% dles aziuns. Le pinsier: sciampa la Sozieté plü importanta de Mareo te mans forestes?

Na domanda che i ti un ince fat al presidënt Georg Mutschlechner. La intervista ciafëise t’La Usc di Ladins di 24 de jügn. Iló podëise ince lí ci che l’ombolt de Mareo respogn ala critica che le Comun á speculé.  (pablo)