Al ê n’atmosfera particolara, en mertesc ai 9 d’agost domisdé, danter i mürs dla Engelsburg tl convënt da Neustift: n’atmosfera de pesc, de spiritualité, feter mistica – podesson dí. Dales 4 domisdé él gnü tigní iló la pröma rapresentaziun de "fiat lux" – n tritich de leteratöra, musiga y pitöra, nasciü do la idea y le conzet dl jornalist y scritur Iaco Rigo, la musiga dl dirighënt de cor Ludwig Rindler y l’ert dl artist Albert Mellauner. Le proiet se tol dant da revaluté la oraziun tradizionala d’Les Ores y é n contribut de valüta al cërtl de manifestaziuns por i 880 agn dl convënt da Neustift.
Le nojel dl proiet é na composiziun che döra chi 25 menüc y vëgn portada dant da n cor moscedé cun 7 ciantarines y ciantarins plü n percussionist. Musiga originala che liëia le ciant gregorian cun melodies tradizionales d’aldedaincö. Da cornisc fej draps da corú dl artist Albert Mellauner, che simbolisëia le scür y la löm, le de y la nöt dla vita. Chi che ó instësc jí a ti ciaré ala mostra, pó ciamó le fá cina ai 6 de setëmber. "Fiat lux" é davert dal lönesc ala sabeda dales 10:00 ales 17:00 (en Santa Maria dal Ciüf él stlüt). Les composiziuns acompagnëia i vijitadus tresfora sciöche musiga de sotfunz – che á te chisc pröms dis dla mostra bele albü dër na buna ressonanza. Por chi che ó indere les aldí dal ví, vëgneres portades dant dal cor moscedé vigni mertesc dales 16:00, cun l’ultim iade ai 6 de setëmber 2022.
Deplü podëise lí t’La Usc di Ladins di 19 d’agost. (pablo)
"Fiat lux" – al vëgnes löm
Data
15 de agost 2022
Grandeza scritura
Social
Tla Engelsburg dl convënt da Neustift él gnü tigní la daurida y pröma rapresentaziun de "fiat lux": n proiet de leteratöra, musiga y pitöra che interpretëia y revalutëia danü tesć fora dla vedla oraziun d’Les Ores. N contribut ladin por le iubileum de 880 agn dl convënt
