La Usc di Ladins

Al é zacai che tlocora. Ince sce nia düc y dötes ó propi l’azeté, ara é gnüda tan inant, i 30 tlocora pro porta y l’ocajiun ê buna da pié ia adöm en jita por festejé. En sabeda dadoman adora gnôra da pié ia cuntra la cité de Minca. Bele te bus él gnü sö la buna löna, an á soné y cianté y an á ciacolé cun compagns y compagnes che an n’â dî nia plü odü. Do na buna marëna sön tru sunse spo stá chic püch dan la cité por jí a soghé a ‘paintball’, n jüch olache an stlopëta cun patrones da corú. Chiló án spo tosc odü chi che é ciamó frësć y en forma y chi che é gnüs scialdi stari. Do chësta gran assuiada sunse jüs a chirí sö nosc alberch. Do na duscia y na picera palsa sunse piá ia cuntra la biraria dla Paulaner. Chiló nes él gnü cunté de vigni sort y i un podü ti ciaré ales mascins y ai injins che an adora por prodüje la bira. Dopró n'ál sambëgn nia mancé na buna cëna sostanziosa, acompagnada da na bira o l’atra. La sëra unse spo stlüt jö festejan chisc 30 tla vita de nöt dla cité de Minca. En domënia, do avëi gosté sciöche al toca, s’unse metü sön tru derevers cuntra ciasa, olache i s’un archité ciamó n ultimo iade por marné adöm. Al é sté dui de beliscimi dis passá deboriada olache bëgn 42 jogn y jones dla valada á tut pert. N gran dilan a Miriam, Mary, Julia, Freddy, Ivan, Emanuel y David che á organisé chësta bela jita y a s’odëi pro la proscima te n valgügn agn.  (Timo Craffonara)