La Usc di Ladins

Heinz Kostner é sté na porsona particolara y naturala, conesciüda dalunc y daimpró por sües pasciuns sportives y so spirit de iniziativa. Bëgn por sis legislatöres él sté ombolt da Corvara. Y de chësta esperiënza nes cuntel te na intervista (fata da Elisabeth Penazzi por le Calënder Ladin 2016) instës.

Heinz Kostner: "Mia inciaria da ombolt s’á porté pro n pü’ por caje. En ocajiun dla inaudaziun dl implant portamunt de Boá unse cherdé adöm düc i ostis cun l’intenziun da mëte a jí na festa y n past por düc, valch che ess podü se lascé odëi lunc y lerch y che an ess ciamó recordé por tröc agn. Y insciö éra ince garatada. Te chi agn n’êl te comun nia massa n bun clima y na aministraziun n pü’ stentada, che se damanâ mudaziuns. Porchël él gnü metü sö na lista cun candidac nüs. Cun 33 agn y por mirit ince dl suzes dla festa de inaudaziun, sunsi insciö deventé ombolt. Ti pröms agn de mia inciaria m’ái dé jö cun cotan de ligrëza y buna orenté, mo cun le passé di agn s’á döt n pü’ aplaté ia. A dí l’aurité m’á la politica pordërt dagnora desturbé. Porchël ái ciaré da m’un sté dalunc y da lascé fá ince valgamia döt ci che é gnü ghiré, tan inant che al ê a norma. Tratan mies 6 legislatöres él gnü realisé cotan, él pö ince sté i agn dl majer svilup economich y turistich: la Ciasa de Comun cun la sënta di Destüdafüch, l’ufize dla posta y l’ufize dl’Assoziaziun Turistica, la scolina, les scores y les cortines da Corvara y Calfosch, les canalisaziuns por l’ega blancia y l’ega foscia y deboriada cun le Comun de Badia döes zentrales dal strom por la sarenara. Baldi, ci che é jü a sbüja, é stada la Stala Soziala! Sëgn savunse che le proiet ne stô nia n pe ciodí che l’agricoltöra a chëstes altëzes ne le pormët nia. Por la fá funzioné ess vigni mëmber messü contribuí ince instës, mo te chësc cajo ál mancé la orenté! 

Ti medemi agn sunsi ince sté mëmber de tröpes assoziaziuns. Canche an é te na posiziun plö o manco importanta él sciöche na roda che te ciücia ite ince te d’atres. I sun sté mëmber fondadú dla Südtiroler Sporthilfe y dailó ince vize-presidënt por n per de legislatöres. I sun gnü lité presidënt dla Uniun dles Rodes y á laoré bun adöm cun Eduard Tavella, Moritz dl Ustí y tröc d’atri apascioná y i á contribuí a mëte al monn la Maratona dles Dolomites, che vá sëgn inant zënza nosc aiüt, mo do avëi ascuté sö nosc consëi. 

Mo l’inciaria por me plö importanta é stada la nominaziun a rapresentant dl Aeroclub d’Italia pro le FAI (Federaziun Aeronautica Internazionala) cun sënta a Paris. Te chësta comisciun, cun la partezipaziun de esponënc da döt le monn, unse metü jö punt por punt le regolamënt por les gares di joliers y di parapënc."

Liéde inant deplü tla ediziun nöia atuala de La Usc di Ladins!