La Usc di Ladins

En la pröma domënia de Advënt á la Cöra de Badia podü, cun gran ligrëza, tó sö sis ministranc nüs. En chësta ocajiujn él ince gnü saludé y rengrazié i ministranc pronti da jí »en ponsiun«. A Badia pó i ministranc mëte man le sorvisc dala terza elementara insö y röia l'ativité do set agn, canche ai é te terza mesana. Tratan la gran mëssa án podü aldí fora ci bel sorvisc che i ministranc fej. Siur Degan Iaco Willeit á alzé fora le sorvisc dl ministrant sciöche n sorvisc nobl por la cöra. Al é brau che le sorvisc vëgnes fat cun tan d'impëgn y ligrëza da pert di mituns y dles mitans. Ester ministranc ó dí por nüsc mituns y por nostes mitans podëi se eserzité cun la puntualité, la lezitënza, l'interes, la responsabilité y le lauré adöm cun n grup. En la festa él gnü rengrazié le grup de jogn che á por bëgn set agn alalungia acompagné i ministranc cun gran impëgn y buna vëia. N gran giulan ti vá a Nicol Burchia, Matthias Burchia, Lukas Castlunger, Daniela Valentin y n valgügn agn á fat para ince Sonja Untersteiner. Giulan sambëgn ince ai ministranc por döt l'impëgn y le tëmp che ai dedichëia a chësc sorvisc. Da sëgn inant saral n grup de geniturs, adöm cun l'aiüt di ministranc jogn, che manajará la uniun di ministranc.  (kp)