La Usc di Ladins

Nia tan Vaia dl 2018, mo dantadöt les gran novüdes dl 2019 y dl 2020 á porté pro ala gran difujiun dl arlogn – o chefer dla scorza – te nüsc bosć. Do la gran tampesta, che â sciuré jö zacotan de lëgns, ê i bosć scialdi gnüs romená sö. Ci che an n'á indere nia sciafié da fá por i lëgns tomá sot le pëis dles gran nëis arsides dl 2019 y 2020. Al s'á insciö cherié n habitat ideal por le chefer y les temperatöres tres plü cialdes (a Corvara an mosoré dl 2022 +2 degrá respet al dezen da denant, ndr) á ince daidé pro al svilup de chësc parassit. Le problem n'é nia le chefer instës, á alzé fora i esperc tratan la sessiun, mo la gran velozité cun chëra che al se moltiplichëia.

Tratan la sessiun forestala a Badia á le colaboradú dl Ispetorat Forestal da Bornech Klaus Oberlechner porté dant deplü sön le chefer, dedô á le comissar dl Ispetorat, Gottlieb Moling, splighé les strategies cun chëres che an proa da combate l'arlogn. Ala fin di dui referac ti án passé la parora al publich y al é gnü a s'al dé na discusciun plü lungia, cun ince val' polemica. Deplü é i paurs, y patruns de bosć, che s'á lascé sö critican les informaziuns, da d'ëi infora gonot püch tleres y les strategies nia dagnora coerëntes, cun chëres che an á porvé y proa inant da afronté chësta plaia. 

Deplü sön ci che al é gnü dit tratan la sessiun forestala podëise lí tla ediziun stampada da en vëndres ai 27 de jená.  (kp)