La Usc di Ladins

Tl’Austria él vegnù fat dl 2020 n stude sun i valours dla joneza, che la Euregio Tirol–Südtirol–Trentin à volù slargé fora a duta la euroregion. Scienziés é vegnùs enviés da ti cialé plu avisa a ciamps desvalifs dla vita. Ulrike Stadler–Altmann, professoura de Didatica generala y Pedagogia scolastica tla Università Liedia de Bulsan à metù l azent de sia enrescida sun l svilup dl conzet de se enstesc, l svilup dla scola y dles lezions, sciche ence la projetazion di ambienc de stude. I ti òn damané co che ela veiga l mond dla joneza tla Euregio.

Prof. Stadler–Altmann, ciun fova pa l travert de chest stude?
L interes prinzipal fova chel de emparé a conesce miec la joneza y enscì ence si ambient de vita. I joegn y les joenes che à encuei anter 14 y 16 agn sarà te puec agn chi che ti darà forma a la sozieté tla Euregio y sourafora. Te sia vita privata y profescionala, sciche ence te si impegn sozial y politich, se orientarài devers si valours, che ai é sen tl laour da renforzé. Eco ciuldì che i resultac de "Lebenswelten" desceda entusiasm y é informatifs per duc chi che se dà ju per laour o privatamenter con la joneza y con i svilups soziai: en particolar per i genitours, per i istituc de formazion desvalifs y per les imprejes, sciche ence per la politica a duc i liviei dla Euregio Tirol–Südtirol–Trentin.

I eis anunzié i valours y les aspetatives encer la lita de n laour o de n partner. Podeise nes fé valgugn ejempli?
Samben ne ti ònse nia damané diretamenter cie laour volesseste pa fé o cie partner cherisseste pa fora. Ma i resultac dles analises mostra su che la joneza dla Euregio é daverta a prospetives desvalives de cariera y che a la tegn alaut la lezitenza y l’ambizion. Chestes é de bones premisses per vigni cariera profescionala. Ence tla lita dl partner é i joegn scialdi daverc. Chest vuel dì che ai ne scluj nia fora a priori partners de na cultura desvaliva o con na dejabilité.

Duta la intervista podeise lieje tla Plata Université d’La Usc di 2 de fauré. Ilò nes conta la prof. Stadler–Altmann anter l auter cie aspetatives che la joneza à y cie temes che ti dà da pensé.