La Usc di Ladins

Ai 7 de fauré 2023 él gnu prejenté a Udin la gran novité: sen é le furlan ence "lingaz ofizial de Facebook". L’iniziativa é nasciuda da la colaborazion anter Region Firul–Aunejia–Giulia, l’Arlef (Agenzia regionala per l lingaz furlan), la firma Insiel spa y le colos Meta Platforms, y fej pert dl "Plan general de politica linguistica per l lingaz fural 2021–2025", atué da la Region per promueve la defujion dl furlan zal esperienza de adoranza dles maioures plataformes tecnologiches. I audion Pierpaolo Roberti, l assessour regional ai Lingac de mendranza, dant a l'Ansa: "Chest obietif arjont con la prejenza dl furlan sun l social Facebook é demé una dles truepes iniziatives portedes inant te chesta legislatura per na adoranza tres plu spessa dla 'marilenghe', da ne rejoné nia demé te familia, ma ence te duc i contesć."
Interessant él ence da audì cie che l aministradour soul de Insiel Diego Antonini à dit dant a la stampa en cont de chest projet: "Al é demé l prum vare de na linia de iniziatives che i menon inant, anter chestes l tradutour online talian–furlan".
L lingaz furlan pò gnì adoré al moment te Facebook demé tla verjion web, i tecnics laora per ativé chest lingaz tant vejin al ladin dles Dolomites ence sun les apps di fonins.  (Iaco Rigo)