La Usc di Ladins

La situaziun sön la strada dla Val Badia vëgn tres plü critica. Y sce chësta strada mëss gní stlüta, sán che al é le chaos programé. Chësc án odü ai 25 de forá – na sabeda de sajun – canche an á messü saré la strada por peres tomades jö. Do chësc fat che é sté bindebó de desfida, s’á i cin’ ombolc dla Val Badia indô ót cun na lëtra al assessur ladin Daniel Alfreider, por sotrissé le gran debojëgn da fá inant por assiguré la strada y forsc por rové a na soluziun plü definitiva. I ombolc scrii: "I oresson ciamó n iade alzé fora la gran situaziun de prigo sön la strada dla Val Badia, danter Picolin y Longega; te chësc toch él tres fora n prigo da peres, de mëndres roes y la tomada de lëgns sön strada, dantadöt canche al tempiëia o che al delega. Sön la tëmpla él de plü posć dër prigorusc y tres indô tomel peres te strada. Lapró vëgnel le fat che por gauja dl chefer vál tres plü a perde la funziun dl bosch de sconanza (...) Al é gran ora da tó na soluziun. La segurëza dles tröpes porsones che passa sön chësta strada, mëss avëi la mascima priorité", scrii i ombolc. Tla reuniun él gnü baié de tuní y porté dant de plü propostes. 

Chëstes propostes podëise odëi t’La Usc di Ladins dl 31 de merz, olache i ves dijun ince ci novités che al é por la zirconvalaziun da Longega y ci laurs che al é preodü por la strada che s’armöi a Puntac de Badia.  (pablo)