La Usc di Ladins

Les gran agajuns che á atoché l’Emilia Romagna tles ultimes edemes é ries da trá adöm te püces parores. Les plöieres fora de mosöra á bele metü man ai pröms de má y á spo tigní pro tres danü. Les conseguënzes é stades chëres de n gröm de rüs che é jüs porsura, paisc intiers sot ega cun düc i avëis dla jënt, 36 mile zitadins che á messü fora de sües ciases (26 mile n’él ciamó atualmënter), cina sëgn 14 porsones che á pordü la vita. I danns materiai vá ti miliarg de euro, chi emozionai se ingrava ite tles recordanzes dla jënt. Dl ater vers él n gröm de jënt che dëida. Ai 17 de ma é piada ia la pröma scuadra de Südtirol cun la proteziun zivila, 12 omi stödafüch profescionai da Balsan y ince 19 stödafüch volontars dl raiun dla Bassa Val de Puster. Pro chisc êl ince l’ispetur dl raiun Alta Badia Andy Pertot y le stödafüch da San Ciascian Jacopo Pezzedi – che é jüs a daidé a Castrocaro Terme y spo a Forlí. Denanche pié sö zoruch en domënia sëra, á le pröm grup ciamó aspeté le secundo plotun cun 29 stödafüch dl raiun, por ti dé inant les informaziuns y surandé l’intervënt. Pro chësc secundo grup êl ala pert sis stödafüch dla Val Badia: por i stödafüch da San Martin él l’ispetur dla Bassa Val Badia Alex Zingerle, Fabian Zingerle y Herbert Videsott; di stödafüch da La Val Damian Miribung, Philipp Miribung y Gabriel Nagler. Ëi porta so förtl y süa man fora por les strades de Forlí.

"Chësta jënt á pordü döt", dij Andy Pertot cun na usc che n’ascogn nia les emoziuns. De paltan indlunch y gran reconescënza da pert dla jënt baia l’ispetur Alex Zingerle. T’La Usc di Ladins di 26 de ma podëise aldí sües impresciuns, olache ai nes cunta dla situaziun lajö, dles dimenjiuns dla desgrazia, dl laur che ai fej y de n intervënt fora de vigni mosöra.  (pablo)