La Usc di Ladins

Le congres FIS á publiché le calënder ofizial por la Copa dl Monn maschila y feminila dla sajun 2023/24. La gran novité é che Fascia ará döes gares asveltes de Copa dl Monn dla ëres, porchël saral en ater ann d'invern gares de Copa dl Monn bëgn te cater valades ladines (sön cinch).

Ëres
Les gares sará indöt 45, partides sö valivamënter tles cater disciplines: 11 disceses, 11 superG, 11 slaloms lerc y 11 slaloms, a chëres che al s’ajunta na combinada a scuadres (manche de discesa plü manche de slalom). Le calënder pëia ia desche al é usus a Sölden söles nëis dl dlaciá de Rettenbach (ai 28 de otober 2023). Chisc i apuntamënc tla Talia: sabeda 18/11/23 discesa a Zermatt/Cervinia (Svi/Ita), domënia 19/11/23 discesa a Zermatt/Cervinia (Svi/Ita), vëndres 26/01/24 discesa a Cortina (Ita), sabeda 27/01/24 diescesa a Cortina (Ita), domënia 28/01/24 superG a Cortina (Ita), mertesc 30/01/24 slalom lerch a Al Plan de Mareo (Ita), sabeda 24/02/24 superG te Fascia (Ita) y domënia 25/02/24 superG te Fascia (Ita).

Ëi
46 sará les gares di atlec por la Copa dl Monn 2023/24. Bëgn 9 é les staziuns tla Talia. I ëi de Copa dl Monn fajará indöt 46 gares: 12 disceses, 9 superG, 11 slaloms lerc y 13 slaloms speziai, cun lapró n team combined (manche de discesa plü manche de slalom).
Les finales dla Copa dl Monn sará en ater ann, por ëres y ëi, a Saalbach–Hinterglemm.
Les tapes dla Copa dl Monn di ëi tla Talia é chëstes: sabeda 11/11/23 discesa a Zermatt/Cervinia (Svi/Ita), domënia 12/11/23 discesa a Zermatt/Cervinia (Svi/Ita), vëndres 15/12/23 superG te Gherdëna (Ita), sabeda 16/12/23 discesa te Gherdëna (Ita), domënia 17/12/23 slalom lerch a La Ila (Ita), lönesc 18/12/23 slalom lerch a La Ila (Ita), vëndres 22/12/23 slalom spezial a Madonna di Campiglio (Ita), jöbia 28/12/23 discesa a Bormio (Ita), vëndres 29/12/23 superG maschil a Bormio (Ita).