La Usc di Ladins

En gaujiun dl pröm aniversar dla mort dl linguist Luca Serianni, antergnüda a Ostia ai 21 de messé dl 2022, röia adöm söla munt de Fanes na bela cumpëda de sü ex studënc y ex studëntes dl’université “La Sapienza” de Roma, por passé n per de dis en compagnia, recordé y partí esperiënzes, emoziuns y pinsiers sura le professur, che á lascé n gran öt tl monn academich talian y n gran incherscimun danter düc chi che l’á conesciü y che á podü aprijé so savëi imens y süa umanité sota y generosa.

Por passa 37 agn alalungia á Serianni insigné Storia della lingua italiana tl’universités de Roma, y al fajô pert de academies scientifiches de gran prestisc: chëra di Lincei, chëra dla Crusca, chëra dles Scienze e Lettere di Torino, y al ê ince vize presidënt dla Societá Dante Alighieri. Daspavënt gran é sté so impëgn divulgatif, testemonié da prësc 400 publicaziuns, danter gramatiches y manuai de linguistica taliana, libri, articui söi foliec y revistes. Al â dantadöt na atenziun ampla y sinziera por le monn dla scora: al tolô pert ativamënter ales dibates incër l’istruziun y la scolarisaziun, al ê sté consulënt dl Ministêr dla Istruziun publica, ál tignî cursc de ajornamënt tles scores de döta la Talia, y al publicâ de vigni sort de manuai por daidé y acompagné te süa profesciun maestri y insegnanc. 

L’idea da recordé deboriada Serianni y da le fá sön munt ê nasciüda bele le dé de süa sopoltöra, a Ostia. Düc sá che al ê n apascioné de jites y escursciuns, y ajache al ê ince ruvé deplü iadi te nosc raiun ladin por jí sön val’ piza dles Dolomites, él gnü ponsé ala munt de Fanes, n post sugestif y por düc, y che pita na buna poscibilité de albergh. N’atra gran pasciun de Serianni ê la musiga classica. Porchël saral da aldí, en sabeda ai 22 de messé, da sëra, tla Ütia de Fanes n conzert porté dant da Esther Crazzolara y Priska Comploi. Le conzert é davert a düc, vëgnel pö sponsorisé dal Istitut Ladin Micurá de Rü, cun chël che le linguist á colaboré te deplü ocajiuns (al é sté, por ejëmpl, consulënt scientifich dla Gramatica Ladin Gherdëiana, y autur dles parores danfora por le Dizioner Ladin de Gherdëina). Le conzert sará porchël n sëgn de amizizia y de reconescënza da pert dl Istitut Ladin y di studënc y conescënc ti confrunc de Luca Serianni.