La Usc di Ladins

En ocajiun dla Mostra de Cinema­tografia tignida a Aunejia danter la fin d’agost y la pröma edema de setëmber, á la sartorëssa badiota Anita Vittur albü la poscibilité da mostré süa abilité tl monn dl cují tres na colaboraziun cun döes d’atres sartorësses, Gabriella Franchini y Sara Cremaschi, che á porté Anita a n suzes nü: ai 31 d’agost á Anita podü amiré le guant che ara á instëssa cují, jon fora por le tepih cöce de Aunejia. I s’l’un cuntada cun Anita por savëi deplü de chësta esperiënza particolara.

LA USC Anita, co s’á pa porté pro la colaboraziun por le guant? Ciüna é pa stada tüa pert dl laur?
Anita Vittur »I un colaboré te n grup. La stilista, che á bele vistí Jillian Dempsey por la pröma pre­sentaziun dl film dl om ia t’America, á ideé chësc guant madër tl corú fosch. L’artista makeup á damané ala stilista da ciafé le medemo guant madër blanch por la mostra a Venezia, tignida danter la fin d’agost y la pröma edema de setëmber. Canche al é tl rest dla Talia incër mez agost püces sartorësses che laora, á oghé les conescënzes y la mostra de mi laurs söi social media y sön mia plata internet por me promöie, y la stilista m’á contaté. Al é sté na gran colaboraziun tres telefon, ajache i ên dötes dainciará y i n’esson nia albü dlaurela da fá le iade por se incunté. Le tëmp ê cört y ara ne ciafâ degügn che ti ess cují chësc guant, ajache la sartorëssa dl pröm guant fosch ê ince en vacanza. Tl pröm momënt esson orü ciafé valgügn che ess cují le guant dlungia Modena, y iö ess messü garantí che le guant foss rové a Venezia y che al ti foss jü bun atira. Chësta ê massa na gran responsabilité, insciö ái tut la dezijiun da surantó iö instëssa le laur. I m’á metü en contat cun la sartorëssa che â fat le pröm guant y ara m’á splighé sciöche al ê fat. Te n’edema essel messü ester pronto. Ci che i â, ê ma les informaziuns generales: les mosöres, la sort de peza y le corú. I n’â gnanca ciamó le drap, y d’agost ne laorâ gnanca i fornidus.«

Liede inant tla ediziun nöia di 22 de setëmber !