La Usc di Ladins

L’idea por n calënder d’Advënt á albü l'ann passé Elias Frontull da Longega. Lapró êl por ël l’aspet sozial particolarmënter important: n calënder d'Advënt ne dess nia ma avëi n carater da fá plajëi, al dess ince fá ponsé do, incorajé da ti ciaré plü da vijin ai bojëgns dla jënt y mostré solidarieté.
Siur Tone Fiung á surantut l'idea y adöm cun d’atres porsones ál porté inant chësc proiet. Le suzes ch’al á albü n'ê nia da s'aspeté: la pröma ediziun s’é tosc rovada, porchël él gnü fat na secunda ediziun y al é gnü venü zirca 4.000 calëndri d'Advënt.
Chësc ann él indô gnü fat n calënder nü. Leni Leitgeb á chirí, ascorté y adaté les stories adöm a Siur Tone; Elias Frontull y Rita Fiung á fat i dessëgns aladô dles stories. Le team de formaziun dl "Haus der Familie" á chirí y injunté jüc, laurs da pastelné, rezetes y rituai. Le calënder d'Advënt "Löms de ligrëza" é sëgn a desposiziun dles families por les acompagné fora por le tëmp d'Advënt. Le set d'Advënt pón avëi tl "Haus der Familie" söl Renun o al pó gní cumpré a Al Plan te botëga dal Śauter o tla botëga Mascotte, a Pidrô tla botëga Malbo y a Longega tla botëga de Richard Mutschlechner, sciöche ince te dötes les filiales dl'Athesia. Al costa 8,00€, che jará tl fond d'aiüt "Bildung in Not", che le "Haus der Familie" á metü sö por porsones y families che ne pó nia plü se pormëte l'istruziun.

Deplü podëise lí t’La Usc di Ladins di 17 de novëmber