La Usc di Ladins

"I messun rengrazié l’assessur regional ladin Manfred Vallazza, che nes á motivé da presenté le proiet dla costruziun de na ciasa dla comunité nöia chiló San Martin, che toless ite locai nüs dla Musiga y dl Cor de dlijia y dess insciö la poscibilité da ingrandí i locai dl Aiüt Alpin y dla Jonëza tl frabicat atual sot les scores", insciö l’Ombolt da San Martin de Tor Giorgio Costabiei. Lapró ciafass te chësc proiet nü ince le grup dl Bal Popolar Val Badia na süa coa.
Zënza scioldi, nia laurs – podesson dí, y la fondamënta por le proiet de na ciasa y strotöra nöia comunitara a San Martin é zënz’ater bele metüda avisa cun l’azetaziun aministratif–politica y la conzesciun dl contribut finanziar dla Regiun che á ai 11 d’agost 2023 tut la deliberaziun sön proposta dl Assessur Manfred Vallazza dl contribut tla mosöra de 2.843.805,00 Euro. Le proiet de mascima cun dessëgns dl architët Giuseppe Nagler da Pederoa amunta a n costimënt total de  4.620.448,40 Euro: la soma é sambëgn indicativa y nia definitiva.
Aladô dl ombolt Giorgio Costabiei saral da fá inant i vari tecnics adöm ales uniuns dl paisc, por odëi ci debojëgns y aodanzes che süa ativité comporta. Por le vizeombolt y gheometer Felix Graffonara podess la proietaziun esecutiva dl proiet gní scrita fora ciamó en chësc ann, o spo tla pröma spana de tëmp dl ann nü.

Le pinëi: raiun recreatif y sozial

Na ciasa dla comunité nöia tl post olache al é atualmënter le pavillon a San Martin de Tor, söla strada Pinis, ne desgropass nia ma la mancianza de lerch por les uniuns culturales tl zënter de paisc, al liass ince adöm ativité culturala y tradizionala cun l’oferta dl tëmp lëde por mituns, jogn y families, y realisass na oportunité ideala por l’intergenerazionalité che deventará tl dagní tres plü importanta. Dlungia al parch di jüc atual él ince la Ciasa de Palsa, y revaluté döt le raiun cun sorvisc nüs por la cultura y ince por le pröm debojëgn (sorvisc igineich–sanitars publics nüs).

Liede inant deplü tla ediziun nöia de La Usc di Ladins!