La Usc di Ladins

Te plü posć dla Val Badia él chëstes edemes n iade i leri che s’á lascé fora le mat. L’ultim fat püch plajor é gnü descurí en sabeda a Al Plan de Mareo, olache al é sparí dala dlijia na bela Crusc che ê tacada fora te n armé de spidl. Ara se trata de na scincunda particolara, che ti ê gnüda fata ala Ploania da mons. Giuseppe Anfossi, nasciü dl 1935 a Al Plan sciöche möt dl podestá da laota, y che é spo deventé vësco da Aosta dala fin dl 1994 cina al 2011. L’ultim iade él gnü a ciafé chi d’Al Plan en chësc ann pro la festa d’Les Antlés. Ara se trata de na Crusc che le vësco Anfossi â ciafé da Papa Benedët XVI. y ara ê gnüda metüda fora te dlijia d’Al Plan dl 2011. En sabeda dan otedé danmisdé él sté na volontara che s’un á intenü che le pice armé ê gnü danejé y sforzé, tratan che la Crusc é sparida. La Ploania á dé dant le fat pro i Carabiniers.

Deplü podëise lí t’La Usc di Ladins dl 1. de dezëmber, olache i ves cuntun ciamó trëi arobaries stades tla valada, danter scëibes spacades ite a Al Plan y Lungiarü y n furgoncin romené fora a La Val.  (pablo)