I Comuns â tëmp cina ai 30 de novëmber por aprové n aumënt eventual dla cuta de sojornanza, che s’injuntâ ala cuta de basa nöia che la Junta provinziala á aprové al 1. d’agost. Tl’Alta Badia án arjunt na unité altamo ti trëi comuns, cun n aumënt proporzional de 1,30€ pro la categoria alta (da 4* insö), 1,00€ por la categoria mesana (3, 3s, 5 sorëdli y ciüfs) y 0,80€ por la categoria bassa (les atres strotöres. I ghesć paiará insciö ti trëi comuns dal 1. de jená 2024 inant 3,80€ a nöt tla categoria alta, 3,00€ tla mesana y 2,30€ tla categoria bassa. Indere él sté valgünes sorpreses. La maiú bëgn tl Comun de Badia, olache le Consëi á vincolé le 50% dl aumënt ala proietaziun y realisaziun de na
nodadoia publica pro le raiun dl sport da La Ila. Na dezijiun che á fat sciosciüre sura döta la provinzia y che é gnüda tuta sö cun gran delujiun dala Cooperativa Turistica Alta Badia. Chësta ultima á mené fora na tuta de posiziun, che i podarëis lí en pert t’La Usc di Ladins di 7 de dezëmber. Animada é ince stada la discusciun tl Consëi de Comun da Corvara, olache an n’á daldöt nia ligrëza cun les tempistiches - che al vëgn aprové ala fin de novëmber n aumënt che vá bele en forza n mëis dedô. Y an n’á gnanca ligrëza cun la destinaziun di scioldi, che an se tigniss ince plü ion chiló, en pert por proiec mirá. La dezijiun de Badia podess porchël ti fá gní la gola a plü comuns - ince sce a Corvara n’él nia ciamó gran segurëza che ara tëgnes bëgn. A Badia indere bëgn, olache la "locomotiva" dla dezijiun Elide Mussner spligará t’La Usc sües rajuns. A vigni moda: Corvara á ince ma aprové por n sofl, deache sön 14 aconsiadus á ma 8 dit de sce al aumënt. Deplü ves dijunse t’La Usc di 7.12.
Tla bassa valada, olache i comuns de Mareo y San Martin forma la Cooperativa Turistica Al Plan/San Martin, án döes tarifes desvalies. Mareo á aprové n aumënt de 1,20€ por vigni categoria, olache an paiará insciö 3,70€ tla categoria alta, 3,20€ tla categoria mesana y 2,70€ tla categoria bassa. Le Consëi Comunal marô á ince vincolé 0,20€ dl aumënt a sorvisc de bëgn publich che la CT dess surantó. Chisc vëgn fac fora tres convenziun. Deplü ciafëise t’La Usc da incö vëndres al 1. de dezëmber. Le Consëi da San Martin á aprové n aumënt de 1,10€, insciö che an paiará tl comun de mesaval pro vigni categoria 10 cent demanco co tl comun de Mareo.
(pablo)
