La Usc di Ladins

Te chël tëmp é l’angel Gabriel gnü mené da Idî te na cité tla Galilea dal inom Nazaret da na vergina; ara ê impormetüda a n ël dla ciasa de Davide che â inom Ujöp, y l’inom dla vergina ê Maria. L’angel é jü ite da d’ëra y á dit: Ave, tö plëna de grazia, le Signur é cun te. Ara s’á spordü da gní baiada ados insciö y ara ponsâ do, ci che chësc salüt dô significhé. Ailó ti á l’angel dit: No te temëi, Maria; deache t’as ciafé grazia pro Idî. Te ciafaras y metaras al monn n möt: a d’ël desste ti mëte inom Gejú. Al sará gran y gnará nominé Fi dl Altiscim. Dî, le Signur, ti dará le tron de so pere Davide. Al regnará sura la ciasa de Iacob por dagnora y süa regnanza n’ará degüna fin. Maria ti á dit al angel: Co dess pa chësc sozede, deach’i ne conësci degun ël? L’angel ti á respognü: Le Spirit Sant gnará sön te y la forza dl Altiscim destenará süa ambria sura te. Chël che nasciará sará porchël sant y gnará nominé Fi de Dî. Ince Elisabeta, tüa parënta, á ciamó conzepí n fi te süa eté; scemia ch’an aratâ ch’ara ne ciafass nia plü mituns, éra sëgn bele tl sesto mëis. Pro Idî ne n’él nia de imposcibl. Ailó á dit Maria: I sun la fancela dl Signur; al sozedes cun me sciöche t’as dit. Spo s’un é l’angel jü demez da d’ëra.

Parora dl Signur. – Lalt a te, Gejú Crist!