La Usc di Ladins

Te nosta provinzia él bëgn 136 comisciuns di lüsc, te chëres che al é ala pert 408 ëres y ëi. Ai 12 de dezëmber éseres gnüdes nominades danü y ares sará en ciaria por i 5 agn che vëgn. Les comisciuns se dá jö dantadöt te chestiuns canche al müda les proprietés de terac o frabiches di lüsc stlüc, mo ince sce n lüch stlüt vëgn surantut, sce al vëgn lascé sö o al é stritaries. Dlungia les comisciuns teritoriales él ciamó na comisciun di lüsc provinziala, che restará ciamó en ciaria cina al ann che vëgn. Chësta é la istanza sce al vëgn fat recursc. Tla Val Badia él cin’ comisciuns – öna por comun. 
Dötes les cin’ comisciuns á Manfred Vallazza sciöche presidënt y Margareth Innerkofler sciöche sostituta. I atri dui mëmbri se müda spo da comun a comun. Tl comun de Corvara él Helmut Thaler y Ingrid Castlunger (sostituc Thomas Alfreider y Charlotte Castlunger); tl comun de Badia él Moritz Irsara y Alma Tasser (sostituc Albert Pescollderungg y Elisabeth Crazzolara); tl comun de Mareo él Egon Trebo y Ulrike Rubatscher (sostituc Hans Trebo y Katharina Pisching); tl comun da San Martin él Martin Flöss y Annelies Valentin (sostituc Günther Castlunger y Maria Frenner); tl comun da La Val él Michael Rubatscher y Valeria Comploi (sostituc Daniele Moling y Gabriele Alber).  (pablo)