La Usc di Ladins

Canche la uniun de n paisc arjunj mez secul de vita, spo él zënzater na buna rajun da fá festa. Insciö ésera ince stada tla fin dl’edema passada, olache l’assoziaziun dl palé ASC Mareo á podü destodé sües prömes cincanta ciandëres. Pro l’at ofizial la sabeda danmisdé dlungia le ciamp dal sport »Ciamaor« n’án nia ma odü les ultimes gotes de plöia dla sëra denant, mo ince val’ gotes che rogorô dai edli di protagonisć da inier y da incö – chi che á metü en pe la uniun, chi che l’á daidada crësce y chi che la porta inant cun slöm ince aldedaincö.
Por daurí i festejamënc ofiziai s’án lascé ispiré ai pröms campionac dl palé dla Val Badia, canche les scuadres »defilâ« fora por les strades de paisc danter i aplausc dla jënt. Insciö s’á düc canc abiné defata defora dal ciamp dal sport, olache al é pié ia l’ingres cun les autorités, dirigënc, sogadus y simpatisanc, acompagná dai sonns dla Musiga d’Al Plan. Düc é spo gnüs saludá sön plaza dla festa da Paul Pisching, che manajëia la uniun da 7 agn incá y che á cunté en cört co che la uniun é gnüda a s’al dé.
Pro la festa n’á nia mancé testemonianzes di protagonisć da inier y incö, i salüc da pert dles autorités y ince la benedisciun de n pulmin y di laurs di ultims agn.
La cherscia söla turta é stada la proieziun de n video, te chël che Diego Clara á documenté i 50 agn de storia cun retrac, recordanzes y testemonianzes.

Deplü sön la festa de iubileum ciafëise t’La Usc di Ladins di 7 de jügn  (pablo)