Al é dis de gran plüra a La Val, por la mort tomperia dl Ombolt Angel Miribung, gnü a mancé por na desgrazia sön munt tla Svizera. Sciöche al é preodü dal iter legislatif, toma te n te caje ince le Consëi de Comun. La Junta Provinziala de Südtirol á tla sentada da incö ai 2 de messé deslié le Consëi de Comun, tratan che al sará le vizeombolt Felix Dapoz che surantol les ajëndes, cina ales lîtes nöies (o sce al mancia, le mëmber plü vedl dl Consëi). Cina dailó jará ince inant le laur de Consëi y Junta. Aladô dl ordinamënt regional, sará les lîtes danter le 1. de novëmber y i 15 de dezëmber 2024 y le Consëi y Ombolt nü restará en ciaria cina dl 2030.
Corones y sopoltöra dl defuntA
chëres ne ponsa indere ciamó feter degügn a La Val, olache nia ma la familia, mo na comunité intiera sint impara la gran locia lasciada zoruch da Angel Miribung. Chisc é i dis dla plüra y dla oraziun.
Les corones por le defunt vëgn periades incö mertesc y en doman mercui dales 20:00, te dlijia de paisc y te ciasa dl defunt.
La sopoltöra sará spo en jöbia danmisdé, olache an pëia ia dales 9:00 da doman da ciasa dl defunt, y la mëssa de comié sará spo dales 9:30 te dlijia. Al rovará alerch ince le Vësco Ivo Muser, cun chël che Miribung cun n grup da La Val jô n iade al ann ince sö por munt.
Manifestaziuns desditesIntratan él ince la comunité che mostra le respet por la situaziun, lascian tomé manifestaziuns preodüdes. En vëndres sëra êl preodü
le musical "N de a La Spona" cun i assistis dl zënter sozial; chësc é gnü sburlé a da d’altonn. Desdit án ince
la segra da La Val, che foss stada söl program chësta fin dl’edema. Da fá de gran festes te paisc, n’él sëgn nia le momënt.
(pablo)