La Usc di Ladins

L’internet é incö oramai indispensabl, no ma por i privac, mo dantadöt por les ativités economiches; cun la chersciüda dla domanda él cis por i zëntri turistics de gran importanza da avëi conesciuns indortöra – asveltes y stabiles. Al é porchël da capí che an mira tres deplü da arjunje ti paisc na rëi de fira otica – na infrastrotöra che costa indere n gröm de scioldi. Chësc sán ince te Mareo, olache an baia de fira otica da na desëna d’agn incá. Le caje á orü che i paisc da Rina y La Pli l’á ciafada denant, por mirit de n contribut europeich de n miliun d’euro che le Comun de Mareo á ciafé por destiné ai dui paisc manco svilupá. Le zënter turistich d’Al Plan é romagnü sön tru y te chisc ultims agn él sté le Berch d’Al Plan y le Comun che á n pü’ "salvé la situaziun", sciafian da taché ite ala fira altamo na pert dl paisc. Le Comun ti é indere sté do inant ala chestiun y sëgn dess ince le maiú paisc dla valada ciafé na soluziun definitiva, cun l’aiüt dla Infranet – na sozieté che é feter deplëgn tles mans dla Provinzia.
Por splighé de ci che ara se trata, á le Comun invié en lönesc ai 30 de setëmber a na serada d’informaziun. Pro mësa cun l’Ombolt Felix Ploner y l’assessur Paul Pisching êl ciamó le presidënt dl Berch d’Al Plan Erich Mutschlechner, sciöche ince le diretur dla Infranet Florian Fiegl y le tecnich Fabian Caser Morcaldi.
Dit en cört: la Infranet investësc feter 2 miliuns de euro por realisé la infrastrotöra dla fira otica por i paisc y les fraziuns dl comun de Mareo, adaté chëra che é bele y surantó spo döta la rëi comunala. Tres la Infranet á i utënc la poscibilité da ciafé la infrastrotöra debann cina dan porta de ciasa. Al basta dé jö na manifestaziun de interes (tod. "Interessensbekundung") anter i 30 de novëmber, sön le sît www.infranet.bz.it Chi che damana l’azes do chësta data, messará instësc paié le cost implü.

Deplü ciafëise t’La Usc di Ladins di 4 d’otober  (pablo)