La Usc di Ladins

Mencia presciapech nef meisc al gran apuntament sportif de la Olimpiades Milan-Cortina che sarà dai 6 ai 22 de firé del 2026 e un di temes emportanc sun desch l é chel de la segureza.

En mèrtesc ai 13 de mé tel Zenter de Adestrament Alpin de la Polizia de Stat de Moena l é stat chiamà ite l Comitat Provinzièl per l Orden e la Segureza publica che tol ite i maores raprejentanc provinzièi e de la Forzes del Orden. Apede al president del Comitat, l Comissarie del Goern Giuseppe Petronzi, l era l General de Corp de Armèda Claudio Mora, l Vizequestor vicarie de Trent Andrea Vitalone, i comandanc de la Forzes del Orden de Finanza, Carabineres e Polizia, i dirijenc del servije de la Protezion zivila de Trent, i comembres de la Fondazion Milan-Cortina e i ombolc de Moena, Pardac e Tieser.
»Na scontrèda emportanta per se cognoscer – à dit l Comissarie del Goern Petronzi – e per meter ju la pruma linees de direzion en merit a orden e segureza publica e tecnich-logistics de viabilità e mobilità en ocajion di Jeghes Olimpics e Paralimpics.«
Con chesta pruma scontrèda sul teritorie scomenza ades la fasa operativa per se enjignèr al miec a chest event. 

Se pel lejer dut su La Usc nr 18 dai 16 de mé: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper.


 (Monica Cigolla)