La Usc di Ladins

Ra azienda Cortina, chera de i servizie a ra parsones, de el Comun de Anpezo, ra me fesc saé de un bel donatio, che 'l é ruà martes ai 29 de aprile. Luciano Pompanin Dimai de Anjelico 'l é aministrator unico de chesta azienda, che ra fesc śì ra ciaśa dotor Angelo Majoni, el diurno, el servizio che và par ra ciaśes, i servizie soziai del paes, pichesee par i vece e par ci che stenta. A fei chesto donatio 'l é stà el grupo de Anpezo de i Alpis de ra asociazion Ana. I à donà 'na smart tv co ra telecamera webcam, che i à betù inze ra palestra de ra fisioterapia. Coscita i tecniche i podarà vede anche da indalonśe cemodo che i se moe chiste none, che 'l é inze chera ciaśa, zenza biśoin de i fei viaśà inaante e indrio par deban. Chesto don el rua poco dapò de chel che 'l é stà fato da ra onlus "The game never ends", anche chel par ra fisioterapia. I Alpis de el grupo Ana i à donà anche un outro televisor, da bete inze chera sala agnó che i none i se pousa, pede el diurno: i podarà dorà anche chesto par fei laore dute aduna, ma anche par se vadà algo in santa pasc,da sera pasà.

De plu tla edizion stampeda de La Usc di Ladins o sun l e-paper a paiament www.lausc.it/e-paper