La Usc di Ladins

Ciüna é pa la relaziun danter lingaz y identité? Olá pëia pa ia un y olá se röia pa l’ater? De relevanza é pordërt olache chisc s’incunta y sciöche les döes perts se moscëda.

»Identité danter lingac« é sté le titul dla serada, desfirada tl Museum Ladin Ciastel de Tor en jöbia ai 29 de ma. Sön le iade danter sonns, lingac y identité, á condüt le conzert dl cor da Viena »cantus iuvenis«, sot ala direziun dl dirighënt da La Ila Mathias Crazzolara. Por le pröm iade s’á le cor esibí cun le dirighënt nü tla Val Badia, da canche chësc á surantut la bachëta.

Al’archirida de respostes ales doman­des é le publich gnü condüt tres le repertore musical de varieté, porté dant dal cor. Danter i mürs dl frabicat storich él gnü porté dant deplü composiziuns, sides classiches co modernes, che á acompagné la letöra di tesć dl’auturia Nadia Rungger – auturia che laora cun deplü lingac por ciafé süa espresciun creativa. Insciö s’á melodies moscedé al sonn de deplü lingac, lascian pro deplü interpretaziuns artistiches dl signi­ficat de »identité«.

(mo)