L artist fascian à fat scontrèr ladins e slovens con na performance che à soscedà enteres e marevea. La mostra UTERES resta fora fin ai 15 de jugn.
En sabeda ai 24 de mé, a Špietar/San Pietro al Natisone, te la provinzia de Udin, l é stat n event artistich e identitèr fora de anter, nasciù da na fradaa de la Majon di Fascegn e l Slovensko multimedialno okno - SMO. L artist fascian Claus Soraperra à portà sia performance UTERES – stata per la pruma outa te Museo ladin a Sèn Jan de setember del an passà – te tera slovena, presidie de na storia linguistica e identitèra che à abù n percors zis paralèl a chel di ladins, enceben che per vigniun originèl e padì te desvaliva vides, a cajon del passaje de tramidoi i popui dal Imper Austroungarich a la Tèlia do la Gran Vera e più tèrt del fascism.
UTERES l é vegnù fora dal besegn de spartir dessema la costions
de identità e de relazion che entravegn anter lesc e persones. Co la esposizion del zicle pitorich UTERES e la performance »Mi smo zemlja_Nos sion tera_Noi siamo terra_We are earth«, l artist ladin à volù meter al luster i contegnui umans leé a la storia di popui e a la storia de la migrazions, elemenc fondamentèi te la formazion de l’identità e del sens de la desvalivanza, da entener desche lesc per se scontrèr anter confin e seida; chela seides tant cognosciudes, padides e vivudes ence da la comunitèdes ladina e slovena.
UTERES à pervedù de enjignèr ca na mostra de la operes pitoriches de èrt contemporèna - depentes ence col cender, l café e l catram – de Claus Soraperra, na performance e n talk per viventèr l confront e l debatit col publich. La mostra UTERES resta fora te la Beneška galerija enscin ai 15 de jugn.
Se pel lejer dut su La Usc nr 21 dai 6 de jugn: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper. (SR)
