La Usc di Ladins

L Ski & Ice College de la Scola de Fascia l é na ezelenza. I lo à dit de tropes en jebia ai 29 de mé, tel cors de la scontrèda endrezèda te Sorastanza per uzèr fora l’emportanza de chest projet, che da passa 20 egn ge permet ai joegn de conjobièr scola e sport con resultac de ezelenza. Anter chisc i doi campions fascegn Chiara Costazza e Stefano Gross, che i à fenì sie percors da studenc pech dant che chesta oportunità pee via, e con mingol de envidia, ma de chela positiva, i ge à dit ai studenc da ades de vardèr de se n emprevaler.

Do l salut del sorastant Federico Corradini, l percors e i numeres del projet Ski & Ice College, metù su del 2002 da la Scola Ladina de Fascia con la sorastanta Mirella Florian e la prof.a referenta Micaela Valentino, travers la cordanza anter la FISI e l MIUR con la sociazion Ski Team Fascia vidèda enlouta da Giorgio Deluca, l é stat recordà dal referent del projet da ades, l prof. Stefano Ellecosta.
Ti egn – à dit Ellecosta – l projet se à avert ence a de autra disciplines e sozietèdes; del 2014 l é stat tout ite ence l bal sui feres e l hockey e en cordanza con la FISG l é doventà coscita l Sky & Ice College.

Paroles de lauda per chest projet, conscidrà desche na ezelenza, é ruèdes da desvaliva autoritèdes e dai campions fascegn Chiara Costazza e Stefano Gross,m a l batiman maor l é jit en ultima a la campiona de freeski Flora Tabanelli, envièda sun paladina ensema con sia familia de la provinzia de Modena.

Se pel lejer dut su La Usc nr 21 dai 6 de jugn: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper.


 (Lucia Gross)