La Usc di Ladins

Tratan chësc ann de scora unse albü le plajëi da fá n iade cultural a Roma. La capitala nes á scinché de gran emoziuns, al é sté bel y emozionant da podëi se perde tles strades strëntes de Roma, y podëi insciö imparé da conësce posć nüs. I sun jüs y jüdes dër tröp a pe, mo al á paié la mëia da fá fadia, dal momënt che i un odü monumënc unics y deplü particolarités che caraterisëia la cité. Ci che ne podô sambëgn nia mancé, ê la spëisa tipica dla tradiziun romana, y chës spezialités é stades n plajëi por nosc palat. I un odü la Plaza de Spagna, la Fontana de Trevi, le Colosseo, la Plaza de San Pire y tröp de ater. Tratan nosta sojornanza unse ince albü la poscibilité de jí al Foro Italico, olache i un ciaré pro a döes partides de tennis cun dui taliagn sciöche protagonisć. 
L’esperiënza che se restará por dagnora te nüsc recorc é sambëgn le momënt unich che i un vit te Plaza de San Pîre, ai 8 de ma.

De chësc nes cunta i scolars y les scolares t’La Usc di Ladins di 13 de jügn