La Usc di Ladins

Canche la sajun da d’invern vá a piz, él ince por i schiclubs le tëmp da trá n bilanz, ci che sozed gonot pro les sentades generales. Por le Sciclub d’Al Plan ésera gnüda a s’al dé le vëndres ai 9 de ma, olache al ê söl program na novité. Por le pröm iade él gnü mostré le film "Oltre il traguardo", che podess ester por ladin "Delá dal travert", te chël che al vëgn documenté n ann de ativité dl sciclub. Autur dl film documentar é le fotograf Gianvito Coco, che abitëia bele da 10 agn incá a Al Plan y é oramai conesciü por so bun edl canche ara nen vá da tigní toch i evënc de paisc. Scialdi le fejel cun l’aparat da fá jö, mo canche ara se porta pro, ince cun la camera y la drona.
A chësta moda á metü man ince chësc proiet, che n’ê tl pröm gnanca ponsé insciö. Le Sciclub l’â plücoater damané por val’ d’ater, sciöche Gianvito cunta: "Le Sciclub m’â damané da fá n per de fotografies por documenté l’ativité. Spo deache i ê impó söl post, m’ái ponsé che i podô bëgn ince fá de te pici videos da mëte online y insciö m’él spo gnü l’idea da fá adinfora n pice film documentatif", dij le fotograf, che vëiga de importanza por na uniun da avëi produc multimediai de cualité, che an pó ti lascé odëi ai geniturs, mo ince ai sponsors che sostëgn l’ativité. Le früt de so laur é n pice film cun 20 menüc de emoziuns.

Deplü podëise lí t’La Usc di Ladins di 20 de jügn