La Usc di Ladins

Pröma sentada "ordinara" – sce an ó ti dí insciö – por le Consëi nü dl Comun de Corvara, olache le Consëi â da desfiré bëgn 17 punc al ordin dl de, ince sce la maiú pert revardâ la nominaziun dles comisciuns comunales desvalies y/o rapresentanzes dl Comun te grëmi desvalis. I punc plü de pëis ê rodunt le pröm y l’ultim, olache ara nen jô de un n vers dl documënt programatich dl Ombolt nü y dl ater vers da dé jö la infrastrotöra dla fira otica.
En cunt dl documënt programatich, á l’Ombolt Roman Crazzolara tut ca le program dla legislatöra da denant, tolon demez ci che é bele gnü fat y meton n valgönes priorités. Al é n program spës, cun punc che vá ince sura na legislatöra fora, mo che dá na vijiun menüda sön la direziun che an ó jí.
Tl ultim punt dan les desvalies á le Consëi messü traté la dezijiun da dé jö la infrastrotöra dla fira otica. Ester êl na "nia–dezijiun", deache al é sëgn diretives a livel statal y europeich che ti proibësc ales aministraziuns publiches da ester ince gesturies dla rëi de telecomunicaziun por chëres che ares dá le sorvisc. Ó dí: i Comuns mëss la dé jö. Le nojel dla chestiun – che reverda ince le Comun de Badia – é che Badia y Corvara â bele dal 2017 inant y sciöche pröms comuns dla valada fistidié instësc da realisé la infrastrotöra cina dan les portes de ciasa, fajon de gragn sforc finanziars. Da la dé jö ne ciafai indere nia döt ci che ai á investí.

Deplü podëise lí t’La Usc di Ladins di 11 de jügn  (pablo)