La Usc di Ladins

Ai 5 de jügn se á incunté a Sares por na picia festa le grup di volontars dla Comunité Comprensoriala Val de Puster, che porta fora les marënes sön rodes te döta la Val Badia. Atira do misdé él sté siur Franz Senfter che á tigní na bela mëssa tla dlijia da sté saurí da Sares, olache an á orü rengrazié dantadöt dl aiüt ciafé dal alt fina sëgn y ince por recordé chi volontars che ne é nia plü danter nos. Dedô él gnü la pert plü löcra, olache an se á senté adöm por na picia marëna tla Ostaria da Sares. Chiló á i volontars podü s’la ciacolé y se baraté fora sües esperiënzes.
Le diretur di Sorvisc soziai, Patrick Psenner, á saludé i presënc y á rengrazié dl gran impëgn zënza fin di 24 volontars atifs te chësc momënt. Tl 2024 ái porté fora por les ciases dla Val Badia bëgn 3.735 pasć. Al ti é spo gnü surandé n diplom y na scincunda a chi volontars che fej chësc sorvisc bel da almanco 5 agn cina a plü co 10 agn alalungia.

Che che é gnüs onorá, podëise lí do t’La Usc di Ladins di 11 de messé