Tla Talia él bele na desëna de festes che vëgn tignides ia por l’ann. Pro chëstes toca tambëgn les festes de Nadé, Nanü, Lönesc de Pasca o Santa Maria dal Ciüf, sciöche ince la festa dla liberaziun ai 25 d’aurí, la festa dl laur al 1. de ma o la festa dla Republica ai 2 de jügn. Dal 2026 incá nen sarál na nöia lapró: la festa de San Francësch d’Assisi ai 4 d’otober. San Francësch é bele sté festa nazionala cina dl 1977, y ne n’é nia n sant sciöche n ater: al é patron dla Talia, deboriada cun santa Caterina da Siena. La revalutaziun de so de sciöche festa nazionala tomará avisa tl iubilé de 800 agn da süa nasciüda. Indere ne sintiarán l’ater ann nia ciamó tan tröp, deache la festa toma de domënia. Mo
dedô sarál na festa da tigní, olache an é lëdi dal laur – na festivité paiada; scores, scolines y ofizi sará stlüc. An capësc porchël che danter les prömes reaziuns él sté chëra dal monn dl’economia, che s’á atira fat i cunc de tan che la festa costa. Öna dles morvëies de chësta dezijiun é chëra che le sant d’Assisi é sté bun da lié parlamentars da man ciampa cina man dërta: bëgn 247 parlamentars dla Ciamena á dit de sce, defrunt ales 8 astenjiuns y ai 2 contrars. Mo che sá pa sce rodunt na veneraziun plü sterscia de chësc sant dl lalt ala creaziun cun so "Cantico delle Creature", sant dla pesc, dla umilté y dla poverté, pó avëi faziuns positives te n monn scassé sö da crises, veres, dl individualism y dl materialism. Chësc y d’ater ti unse damané al teologh Christian Ferdigg, che á studié a Assisi y sint n liam sterch cun le messaje franzescan.
La intervista cun Christian Ferdigg podëise lí t’La Usc di Ladins di 17 d’otober (Intervista: Pablo Palfrader)
