La Usc di Ladins

Ai 28 de setëmber á l’Uniun Bal Popolar Val Badia albü da festejé. Da 40 agn incá vëgnel balé y porté inant l’ativité dl’uniun, che cumpëda dötaorela 13 balarins y 12 balarines. Dan püc agn él gnü lapró la comembranza dl grup jonn di »Platleri Salvans«.
Bel ma por chësc ultim ann pó l’uniun mostré sö n program cun na ativité rica y busiënta: te presciapüch 30 ocajiuns á i balarins y les balarines tut pert a manifestaziuns, defilades y ativités desfarëntes. 
La festa por le iubilé á condüt iniann sön Pralongiá, olache les pizes sblanchejades dles munts y na cuntrada da bí corusc da d’altonn á fat da culissa por l’ocajiun. Al é rové adalerch zirca 70 ghesć: ex-mëmbri y mëmbri dl’uniun á taié la turta y balé en presënza de familiars y de amisc plü strënc.

L’uniun á ince tut l’ocajiun da surandé n’onoranza tan particolara co preziosa: la presdiënta Sarah Alfreider á deboriada al vize presidënt Karl Pizzinini surandé l’onoranza por 40 agn de comëmbranza y ativité tl’uniun a Lois Kastlunger. Tres n diplom, n raiml orginal y n prösc, á l’uniun tut l’ocajiun da rengrazié Lois da Pliscia, che á acompagné l'uniun da süa nasciüda incá cun gran impëgn.


Liede deplü tla ediziun nöia da incö, vëndres ai 17 d'otober!